Dámosvos a benvida á nosa páxina web, un espazo de portas abertas, tanto para os nosos profesionais colexiados, coma para o conxunto da sociedade, que ten acceso á información do sector e, por exemplo, á xeolocalización de establecementos comerciais que contan, como mínimo, cun profesional colexiado.

Dende a constitución do Colexio, no 2007, vivimos uns anos de moito traballo, pero agora o noso labor non rematou, senón que dá paso a algo novo, a unha nova andadura, ilusionante e positiva para todos nós, na que, entre todos, debemos axudar ó seu crecemento e desenvolvemento.

Os tempos cambian e debemos reinventarnos cada día, sendo capaces de adaptarnos a calquera novidade, formándonos e tendo en conta que a defensa dos dereitos dos profesionais e dos consumidores son os nosos bastións.

Nesta época de loita e de primacía de calidade e honestidade, seguimos traballando na consecución do noso soño, que non é outro que a dignificación dos profesionais da xoiaría e o recoñecemento social tanto dos nosos intereses como os daqueles que reciben o noso traballo e dedicación. Nos tempos nos que vivimos, consideramos non só imprescindible defender ós profesionais colexiados, senón tamén, velar polos intereses dos consumidores para que reciban o trato profesional que se merecen.

“A unión fai a forza” non é unha expresión inútil e debemos ter presente que o Colexio é noso, de todos e cada un dos profesionais que o integramos e será todo o eficaz, todo o eficiente e todo o útil que nós mesmos desexemos que sexa, dependendo só da nosa vontade, do noso esforzo e da nosa colaboración, da de cada un.

Desexando que este espazo vos sirva de referencia, tanto a nivel de información legal coma para a vosa axenda, envíovos un cordial saúdo e preséntovos, a continuación, os equipos de traballo do Colexio Oficial de Xoiaría para estes vindeiros catro anos.

D. Óscar Rodríguez Blanco
Presidente