20/04/2023
O Consello da Xunta aproba hoxe un novo Decreto para regular o plan de estudos das ensinanzas artísticas superiores de Deseño, dando así resposta a unha reivindicación histórica do Colexio Oficial de Xoiaría de Galicia e das asociacións do sector.
O Decreto creará dous novos itinerarios na especialidade de Produto: o Xeral e o de Xoiaría e Complementos.
Actualmente os estudos de Xoiaría son un ciclo formativo de grao superior que conducen á obtención do título de Técnico Superior de Xoiaría (FP). Coa implantación, a partir do vindeiro curso 2023/2024, do Título Superior de Deseño de Produto. Itinerario de Xoiaría, pasará a ser un Título Superior equivalente a todos os efectos a un grao universitario.
A titulación impartirase na Escola de Arte e Superior de Deseño Mestre Mateo, de Santiago de Compostela. Porase en marcha o vindeiro mes de setembro e irase implantando gradualmente ata o curso 2026/2027, cando se imparta, por última vez, o cuarto curso consonte o anterior plan de estudos.
Con esta titulación, a Consellería de Educación vén a dar resposta a unha demanda que o sector considera fundamental para dignificar a profesión e recuperar o prestixio e imaxe dos profesionais.